Landmannalaugar eru innan friðlands að Fjallabaki.  Náttúruvernd ríkisins hefur eftirlit með því að umgengni sé góð.  Hún hefur dregið helstu atriði fram til kynningar almenningi:

Akið á merktum vegum og slóðum.

Spillið ekki gróðri.

Truflið ekki dýralíf.

Kveikið ekki elda.

Takið sorp með heim.

Hlaðið ekki vörður.

Spillið ekki hverum og laugum.

Tjaldið á merktum tjaldsvæðum.

Rjúfið ekki öræfakyrrðina að óþörfu.

Ferðamennska er í eðli sínu röskun á umhverfinu.  En séu þessi atriði virt í hvívetna, bæði innan friðlandsmarka og utan þeirra, þá ætti samviskan ekki að bíta neinn.

Aðstaða

Aðstaða fyrir ferðafólk breytist frá ári til árs í takt við fjölgun gesta og kröfur ferðamennskunnar. 

Aðkoma:  Fara þarf yfir tvö tiltölulega grunn vöð.  Beggja vegna eru bílastæði.  Þeir sem ekki vilja aka yfir geta gengið inn á svæðið yfir göngubrú.  Á stærra bílaplaninu (innan svæðis) geta eldhúsbílar tengst vatnsinntaki og niðurfalli.  Ómerkt lendingarsvæði er fyrir þyrlu. 

Gisting:  Stórt fjallasæluhús og frekar hart tjaldstæði (sjá nánar í næsta kafla). 

Snyrting:  Nýtt, stórt hús með 14 salernum og 6 sturtum, 12 stálvöskum og speglum.

Baðaðstaða:  Pallur undir berum himni til að afklæðast á.  Sumir hlaupa frá laug að snyrtingu (u.þ.b. 200 m.). 

Eldunaraðstaða:  Fyrir skálagesti er eldunar- og uppvasksaðstaða í skálanum.  Úti eru vaskar fyrir tjaldgesti.  Þar eru líka stór grill og nokkur borð með bekkjum og skjólveggjum. 

Nauðþurftir:  Lítil búð selur helstu nauðþurftir og nautnavarning ferðamannsins.

Upplýsingar: Sjá kaflann um upplýsingar. 

Neyðarþjónusta: Engin en skálaverðir, landverðir, leiðsögumenn og aðrir sem vinna við ferðamennsku hafa margir þekkingu á fyrstu hjálp og hafa oft bjargað málum. Ekki má ganga að því vísu. 

Símsamband:  Lélegt.  Ekki GSM og bara nokkrir nothæfir NMT punktar fyrir meðal símagræjur.  Virkur sími er hjá skálavörðum fyrir neyðartilfelli. 

Rafmagn:  Ekkert nema þegar skálaverðir gangsetja rafstöð til að geta dælt vatni.  Þá er hægt að setja raftæki í hleðslu hjá þeim. 

Hestar:  Gerði tekur við stóru stóði og hey fyrir það er til sölu. 

Ruslamóttaka:  Ruslapokar eru víðsvegar um tjaldsvæðið og einn gámur í grenndinni.  Fólk er þó beðið um að fara sem mest með sitt eigið rusl til byggða.

Viðgerðaþjónusta:  Engin en svæðið er yfirleitt morandi af bílstjórum sem eru hjálpfúsir og hafa oft bjargað málum.  Ekki má ganga að því vísu. 

Aðgengi fyrir fatlaða:  Ekkert.

Gisting

F.Í. rekur gistiþjónustu í Landmannalaugum.  Skálinn þar tekur 75 manns í kojur og á dynum. 
Verð fyrir gistinótt var 2.200 kr. fyrir aðra en félaga í F.Í. 
Það þarf að panta skálagistingu með góðum fyrirvara. Sími frá 1. júlí til 30. september 854 1192. 

Gisting í tjaldi, (hús)bíl, fellihýsi og þvíumlíku kostaði 800 kr. á manninn fyrir nótt hverja (utanfélagsmenn).  Ekki þarf að panta fyrir þannig gistingu.

Ekki er lengur heimilt að tjalda við Sólvang eða í jöðrum Námshrauns!
Fyrir utan Landmannahelli og Hrafntinnusker, eru Landmannalaugar eini staðurinn innan friðlands að Fjallabaki, hvar gista má.